Rusiye uquq qoruyıcıları 36 yaşında Aqmescit sakinini halqara qıdıruvğa ilân etti. Adam Telegram çatlarında gizli akkaunttan «ruslarnı öldürmege» çağırğan eken. Bu aqta Rusiye kütleviy haber vastaları Qırımdaki Rusiye FSB idaresiniñ malümatına esaslanıp haber ete.
Berilgen malümatqa köre, erkek Qırımdaki Rusiye oquv yurtlarından biriniñ kafedrasında çalışa. Al-azırda onı «Ekstremist faaliyetine açıq çağıruv» (Rusiye Federatsiyası Ceza kodeksiniñ 280-inci maddesiniñ 2-nci qısmı) maddesine istinaden qabaatlaylar. Oña beş yıl apis cezası berile bile.
Aqmescitli ne ve angi çatlarda yazdı aytılmay. Adı ve soyadı aydınlatılmay, açıq izaatları yoq.
Ukrayina prezidentiniñ Qırım Muhtar Cumhuriyetindeki temsilciligi Roskomnadzor Qırım da olğan Ukrayinanıñ Rusiye tarafından işğal etilgen topraqlarındda kontrolni quvetleştire, dep haber etti.
Berilgen malümatqa köre, Rusiye müessisesiniñ emrinen internet provayderleri internet ağına bağlanğan bütün cihazlarnıñ IP adreslerini, geolokatsion malümatını, ağğa irişmek içün qullanılğan bütün cihazlarnıñ identifikatorları, qullanılğan programmalar ve internet trafiki aqqında malümatnı toplap Roskomnadzorğa bermeli.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı qırımlı bloger Aleksandr Talipov öz telegram kanalında Ukrayinağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar RF ordusını «areketsizleştirgenleri» içün yaqalana ve memuriy ve cinaiy mesüliyetke çekile.
