Çeh Cumhuriyetinde Praganıñ merkezinde «Rusiye, Beyazrusiye ve Ukrayina siyasiy mabüsleri» sergisi açıldı.
Radıyo Svaboda yazğanına köre, sergi levhaları Vltava özeniniñ yalısında, Naplavkada yerleşe – yerli sakinler ve turistler içün populâr bir yer.
Panel sergide az bilingen Rusiye ve Beyazrusiye rejimleri tarafından apiske alınğan yedi beyazrusiye, ukrayin ve rus siyasiy mabüsniñ ikâyesi taqdim etile. Bazıları şimdi azatlıqta buluna, digerleri apishanede qala.
Hususan ayrı levhalar kimge bağışlana:
Ukrayina vatandaşı, Qırımtatar Milliy Meclis reisiniñ birinci muavini Nariman Celâl, o, 2021 senesi sentâbr ayında apiske alındı, 2022 senesi gaz borusındaki diversiyada qabaatlanıp, 17 yılğa azatlıqtan marum etildi. Celâl 2024 senesi iyünniñ soñunda Rusiye apishanesinden azat etildi.
Ukrayina vatandaşı Lüdmila Güseynova, Rusiye uquq qoruyıcıları tarafından 2019 senesi Ukrayina kontrolinde olmağan Donetsk vilâyetiniñ bir qısmında Ukrayinağa qoltutqanı içün tutuldı. O, işkencege oğrağan ve 2022 senesi büyük esir deñişüvi çerçivesinde azat etilgen edi.
Ukrayina vatandaşı İrına Danılovıç, işğal etilgen Qırımdan vatandaş jurnalisti ve cemaat faali, o, 7 yılğa azatlıqtan marum etilgen edi. Apishanede bir qulağı sağırlaştı ve diger hastalıqları peyda oldı.
Rusiye vatandaşı Arseniy Turbin, mektep talebesi ve Rusiyede eñ yaş siyasiy mabüs, 2023 senesi cenkke qarşı risaleler tarqatqan edi. 2024 senesi onı çağına yetmegenler içün tüzetüv koloniyasında beş yıl qalmasına üküm etkenler. O, işkence ve çekişüvlerge oğratıldı, apishanede 17 kilogramm azdı.
«Eski Çehoslovaviyada siyasiy esnas ve siyasiy mabüs tecribemiz oldı. Şunıñ içün qomşulıqta olğanlarğa lâqayt olamamız. Beyazrusiye – avropalı qomşumız. Ukrayinanıñ işğal etilgen topraqları ve Rusiyeniñ özünde olğanlarğa lâqayt olamamız», – dedi Çeh Cumhuriyetiniñ Tış işler naziriniñ muavini Yan Maryan Azatlıq Radiosına. O, siyasiy mabüslerge qoltutuv çeh tış siyasetiniñ eski bir parçası ola, dep qoştı.
Çeh Cumhuriyetiniñ Tış işler nazirligi bu sergi vastasınen zor vaqıtlarda cesaret ve metanet örnegi olğan insanlarnıñ taqdirleri ve adiselerni hatırlatmaq isteyler, dep bildire.
Çeh ve ingliz tillerinde sergi Çeh Cumhuriyetiniñ Tış işler nazirligi tarafından «İnsan belâda», Praga vatandaş cemiyetiniñ merkezi ve Gulag.cz işbirliginde azırlandı. Sergi 2025 senesi iyülniñ 18-nden avgustnıñ 15-ne qadar devam etecek.
